खबरदार जर कायदा आणि सुव्यस्थेला बाधा आणाल तर…..!

वादळवार्ता वार्तांकन – केज

ग्रामपंचायतीच्या सार्वत्रिक निवडणुकांच्या पार्श्वभूमीवर जर कोणी कायदा व सुव्यस्था बिघडवीत असेल आणि दंगल घडविण्याचा प्रयत्न केला. तर त्याचे जागीच कंबरडे मोडून काढीत कायदेशीर बंदोबस्त केला जाईल. हे दाखविण्यासाठी केज शहरातून केंद्रीय सुरक्षा दलाच्या शीघ्र कृती दल आणि पोलिसांनी शस्त्र-अस्त्रासह केज शहरातून संयुक्त पथ संचलन केले.

बुधवार दि. २३ नोव्हेंबर रोजी केंद्रीय सुरक्षा दलाचे शिघ्र कृती दलाची तुकडी आणि केज पोलिस यांच्या जवानांनी अत्याधुनिक शस्त्र आणि मशिनगन, स्वयंचलित हत्यारे, सुरक्षा रक्षक ढाल, शिरस्त्राण, बॉडी प्रोटेक्टर्स, बॉम्ब रोधक जॅकेट्स, गुन्हेगारांचे वेध घेन्यासाठी वाहनावर बसविलेले कॅमेरे, जमावाला काबूत आणण्यासाठी पाण्याचे फवारे, अश्रू धुराचे नळकांडे व लॉन्चर याचे प्रदर्शन करीत असामाजिक घटकांच्या उरात धडकी भरविणारे केज शहरातील प्रमुख रस्त्यावरून पथ संचलन केले. हे पथ संचलन शिघ्र कृती दलाचे डेप्युटी कमांडंट शशिकांत राय (पीएमजी) यांच्या नेतृत्वाखाली आणि निरीक्षक प्रमोद कुमार, जनसंपर्क अधिकारी रामनाथ डोंगरे, केज पोलीस ठाण्याचे सहाय्यक पोलिस निरीक्षक संतोष मिसळे, पोलिस उपनिरीक्षक वैभव सारंग यांच्यासह शीघ्र कृती दलाचे ७० जवान आणि केज स्थानिक पोलीस कर्मचारी यांनी संयुक्तरित्या पथ संचलन केले. यामुळे ग्रामपंचायतीच्या सार्वत्रिक निवडणुकांच्या पार्श्वभूमीवर जर कोणी आगळीक केली तर त्याचा प्रसंगी बळाचा वापर करून तात्काळ बंदोबस्त करून कठोर कारवाई केली जाणार असल्याचे संकेत प्रशासनाने दिले आहेत.

अत्याधुनिक वाहने आणि शस्त्र :- पथसंचलन करणाऱ्या जवानांकडे अत्याधुनिक हत्यारे आणि संरक्षणाचे साहित्य व अत्याधुनिक सुविधा असलेली वाहनांचा ताफा बघून नागरिक चकित झाले.