दीड लाखाचे लोखंडी चॅनेलची चोरी

वादळवार्ता वार्तांकन – गौतम बचुटे

केज येथे महामार्ग लगत सुरू असलेल्या हॉटेल उभारणीच्या कामावरील दीड लाख रु. किमतीच्या लोखंडी चॅनेल्सची चोरी झाली आहे.

या बाबतची माहिती अशी की, केज -कळंब रोडवरील विठाई पुरम भागातील माऊली सिनेमागृहा लगत विष्णुदास पापालालजी लोहिया यांचे हॉटेल उभारणीचे काम सूरु आहे. हे हॉटेल लोखंडी साहित्य आणि चॅनेल्स व अँगल यांचा वापर करून तयार करण्यात येत आहे. दरम्यान दि. २ ऑक्टोबर रोजी रात्री अज्ञात चोरट्याने येथील २७ लोखंडी चॅनेल्स चोरून नेले आहेत. ज्याची किंमत १ लाख ५० हजार रु. अशी आहे. या बाबत विष्णुदास पापालालजी लोहिया यांनी दि. ९ ऑक्टोबर रोजी केज पोलीस ठाण्यात दिलेल्या तक्रारी वरून अज्ञात चोरट्या विरुद्ध गु. र. नं. ४५७/२०२२ भा. दं. वि. ३७९ प्रमाणे गुन्हा दाखल करण्यात आला आहे.

सहाय्यक पोलिस निरीक्षक शंकर वाघमोडे यांच्या मार्गदर्शनाखाली पोलीस जमादार बाळासाहेब अहंकारे हे पुढील तपास करीत आहेत.